(...)

Dô sprach daz ander merwîp, diu hiez Sigelint:
"ich wil dich warnen, Hagene, daß Aldrîânes kint.
durch der wæte liebe hât mîn múome dir gelogen,
kúmestu hin zen Hiunen, sô bistu seré betrogen.

Jâ soltu kêren widere! daz ist an der zît,
wan ir helde küene alsô geladet sît,
daz ir sterben müezet in Etzelen lant.
swelche dar gerîtent, die hábent den tot án der hant."

Dô sprach aber Hagene: "ir trieget âne nôt.
wie möhtez sich gefüegen, daz wir alle tôt
solden dâ belîben durch iemannes haz?"
si begúnden im diu mære sagen küntlîcher baz.

Dô sprach aber diu eine: "ez muoz alsô wesen,
daz íuwér deheiner kan dâ niht genesen,
niwan des küneges kappelân. daz ist uns wol bekant.
der kumet gesunder widere in daz Gúnthéres lant."

Dô sprach in grimmen muote der küene Hagene:
"daz wære mînen herren müelîch ze sagene,
daz wir zen Hiunen solden vlíesen álle den lîp.
nu zeige uns überz wazzer, daz aller wiséste wîp."

(...)

(aus dem 2.Teil des Nibelungenliedes; ca 1200 n. Chr.)