(...)
Dô si den hôhgemuoten vor ir stênde sach,
do erzúnde sich sîn varwe. diu scoene maget sprach:
"sît willekomen, her Sîvrit, ein edel riter guot."
dô wart im von dem gruoze vil wol gehoehét der muot.

Er neig ir flîzeclîche; bi der hénde si in vie.
wie rehte minneclîche er bî der frouwen gie!
mit lieben ougen blicken ein ander sâhen an
der herre und ouch diu frouwe. daz wart vil tougenlîch getân.

Wart ihr dâ friwentlîche getwungen wîziu hant
von herzen lieber minne, daz ist mir niht bekant.
doch enkán ich niht gelouben, daz ez wurde lân.
si het im holden willen kunt vil scíeré getân.

Bî der sumerzîte und gein des meien tagen
dorft` er in sîme herzen nimmer mêr getragen.
sô vil der hôhen vreude, denn` er dâ gewan,
dô im diu gie enhende, die er ze trûte wolde hân.

Do gedâhte manec recke: "hey wær` mir sam gescehen,
daz ich ir gieng` enebene, sam ich ín hân gesehen,
oder bî ze ligene! daz liez` ich âne haz."
ez gedíente noch nie recke nâch einer küneginne baz.

Von swelher künege lande die geste kômen dar,
die nâmen al gelîche niwan ir zweier war.
ir wart erloubet küssen den wætlîchen man.
im wart in al der werlde nie sô líebé getân.

Der künec von Tenemarke der sprach sâ zestunt:
"diss vil hôhen gruozes lît maneger ungesunt
(des ich vil wol enpfinde) von Sîvrides hant.
got enlâz in nimmer mêre komen in mîniu küneges lant."
(...)

(aus dem Nibelungenlied)