Ich bin iemer ander und niht eine
der grôzen liebe, der ich nie wart vrî.
waeren nû die huotaere alle gemeine
toup unde blint, swenne ich ir waere bî,
sô mohte ich mîn leit
eteswenne mit sange ir wol künden.
mohte ich mich mit rede zuo ir gevründen,
so wurde wunders vil von mir geseit.

Mîner ougen tougenlîchez sehen,
daz ich ze boten an si senden muoz,
daz neme durch got von mir vür ein vlêhen,
und obe si lache, daz sî mîn gruoz.
Ich enweiz, wer dâ sanc:
ein sittich unde ein star âne sinne
wol gelerneten, daz siu sprâchen 'minne.'
wol, sprich daz unde habe des iemer danc.

Wolte sî mîn denken vür daz sprechen
und mîn trûren vür die klage verstân,
sô müese in der niuwen rede gebrechen.
owê, daz iemen sol vür vuoge hân,
daz er sêre klage,
daz er doch von herzen niht meinet,

alse einer trûret unde weinet
unde er sîn niemen kan gesagen.

Sî ensol niht allen liuten lachen
also von herzen, same si lachet mir,
und ir ane sehen sô minneclîch niht machen.
waz (hât) aber ieman ze schouwen daz an ir,
Der ich leben sol
unde an der ist mîn wunne behalten?
ja enwil ich niemer des eralten,
swenne ich si sîhe, mir sî von herzen wol.

Sît si herzeliebe heizent minne,
so enweiz ich, wie diu liebe heizen sol.
liebe won mir dicke in mînen sinnen.
liep haet ich gerne, leides enbaere ich wol.
Liebe diu gît mir
hôhen muot, dar zuo vröide unde wunne.
sô enweiz ich, waz diu leide kunne,
wan daz ich iemer trûren muoz von ir.


(von Heinrich von Morungen; um 1158 - 1222)