Dem kriuze zimet wol reiner muot
und kiusche site,
sô mac man sælde und allez guot
erwerben dâ mite.
ouch ist ez niht ein kleiner haft
dem tumben man,
der sînem lîbe meisterschaft
niht halten kan.
Ez wil niht, daz man sî
der werke dar under vrî.
waz touget ez ûf der wât,
der sîn an dem hérzen niene hât?


 
Swelch vrowe sendet ir lieben man
mit rehtem muote ûf dise vart
diu koufet halben lôn dar an,
obe sî sich heime alsô bewart
Daz sî verdienet kiuschiu wort.
bete vür siu beidiu hie,
sô vert er vür siu beidiu dort.


 
(von Hartmann von Aue; um 1160 - nach 1210)